NAMANGANDA “ISTIQLOL FARZANDLARI” YOSHLAR FESTIVALI BO‘LIB O‘TDI

“Go‘zal va betakrorimsan, muqaddas Vatanim, jonim senga fido, O‘zbekistonim!” shiori ostida o‘tkazilgan mazkur festivalda turli tanlovlar, fan olimpiadalari va sport musobaqalarida g‘oliblikni qo‘lga kiritgan iste’dodli yoshlar ishtirok etdi.

Vatanimiz mustaqilligining 25 yilligiga bag‘ishlab “Kamolot” yoshlar ijtimoiy harakati viloyat kengashi, viloyat o‘rta maxsus, kasb-hunar ta’limi, xalq ta’limi, madaniyat va sport ishlari boshqarmalari hamkorligida tashkil etilgan tadbirda mamlakatimizda yosh avlod kamolotiga qaratilayotgan doimiy e’tibor ularning zamonaviy bilim va kasb-hunarlarni egallashi, iste’dod va salohiyatini namoyon etishida yuksak samaralar berayotgani ta’kidlandi.

– Prezidentimizning 2014 yil 6 fevraldagi “O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida”gi qarori ijrosi doirasida tashkil etilgan tadbirga viloyat bo‘yicha 15 mingdan ziyod yoshlar jalb etildi, – deydi “Kamolot” yoshlar ijtimoiy harakati Namangan viloyati kengashi raisi M.Ubaydullayev. – Festival eng ulug‘, eng aziz bayramimiz arafasida yoshlarni mamlakatimizda amalga oshirilayotgan keng ko‘lamli islohotlar, ro‘y berayotgan ijtimoiy-iqtisodiy va demokratik o‘zgarishlar, ulkan bunyodkorlik ishlari bilan tanishtirish, ularda daxldorlik tuyg‘usini yuksaltirish va ijtimoiy faolligini yanada oshirishga qaratilgani bilan ahamiyatlidir.

“Navbahor” markaziy stadionida o‘tkazilgan tabdirda taniqli estrada xonandalari va yosh ijrochilarning Vatan, istiqlol, yoshlik tarannumi bilan yo‘g‘rilgan kuy-qo‘shiqlaridan tuzilgan konsert dasturi, qit’a va jahon miqyosida O‘zbekiston sharafini ulug‘layotgan sportchi yoshlarning ko‘rgazmali chiqishlari namoyish etildi.

Tadbir yakunida fan, sport, san’at, tadbirkorlik, hunarmandlik va boshqa yo‘nalishlarda tengdoshlariga o‘rnak bo‘layotgan 25 yoshga to‘lgan 25 yigit-qiz tashkilotchilarning faxriy yorliq va esdalik sovg‘alari bilan taqdirlandi.

O’zA