NEMIS OAV O’ZBEKISTONNING “YASHIL HAFTA” ISHIDAGI ISHTIROKI HAQIDA

“Yashil hafta - 2016” oziq-ovqat sanoati, qishloq, o’rmon va bog’dorchilik xo’jaligi xalqaro ko’rgazmasining ochilishi arafasida “Dusseldorfer Blatt” nashri (Germaniya) mazkur nufuzli anjumanda O’zbekiston ishtirokiga oid maqola e’lon qildi. Mazkur tadbir joriy yil 15-24-yanvar kunlari Germaniya poytaxtidagi «Messe-Berlin» ko’rgazmalar majmui pavilonlarida bo’lib o’tadi.

Manbaning xabar berishicha, joriy yilda ushbu ko’rgazmaga dunyoning 70 mamlakatidan mutaxassislarning kelishi kutilmoqda. Ular orasida O’zbekiston ham bor, albatta. “Yashil hafta - 2016”da chorvachilik, qishloq, o’rmon va bog’dorchilik xo’jaligi, oziq-ovqat sanoatidagi eng so’nggi yutuqlar namoyish etiladi.

Shuni qayd etish joizki, O’zbekistonning agrar jabhasi ilg’or tajriba hisobga olingan holda yangi texnologiyalar va yondoshuvlar asosida shitob bilan rivojlanib bormoqda. Bugungi kunda qishloq xo’jaligining yalpi ichki mahsulot tizimidagi hissasi 15,4 foizni tashkil qilmoqda. 2015-yilning to’qqiz oyi mobaynida mamlakatda 31,8 trillion so’m miqdoridagi qishloq xo’jaligi mahsulotlari ishlab chiqarildi.

Nemis nashrining xabar berishicha, 2016-yilning boshida respublikada eng yangi nou-xau, ishlanmalar va texnologiyalarni o’zlashtirish hisobiga qishloq xo’jaligini modernizatsiyalash bo’yicha Yevropa Ittifoqi tomonidan moliyalashtiriladigan xalqaro loyiha ish boshlaydi. Umumiy qiymati 10 million yevroga teng bo’lgan mazkur loyiha YEI Komissiyasi ko’magida Germaniya xalqaro hamkorlik jamiyati, Fransiyaning Adecia nodavlat tashkiloti, Italiyaning AIA va Bolgariyaning CEED tashkiloti ishtirokida amalga oshiriladi. U ikki asosiy yo’nalishni qamrab olgan - chorvachilik va bog’dorchilik. Loyihani hayotga tadbiq etish muddati – 2018-yilning oxirigacha.

Maqolada qayd etilishicha, mazkur loyiha doirasida rejalashtirilayotgan tadbirlar oziq-ovqat mahsulotlarini konservalash, saqlash, qayta ishlash va qadoqlash jarayonlarini modernizatsiyalash yo’li bilan O’zbekistonning kichik va o’rta fermer xo’jaliklarini rivojlantirishga yo’naltirilgan.

Shuningdek, “Dusseldorfer Blatt” “Yashil hafta - 2016” ko’rgazmasi ishi davomida mazkur nashr vakillarining o’zbek kompaniyalari bo’lmalariga borishi rejalashtirgani va o’z o’quvchilariga bu haqda xabar berajagini ham ma’lum qilgan.

“Jahon” AA, Frankfurt