O’ZBEK MUSIQACHILARINING FRANSIYADAGI YANGI MUVAFFAQIYATLARI

Fransiyadagi “Conservatoire Slave de Music” musiqa maktabida IX Aleksandr Glazunov nomidagi simli cholg’ular xalqaro tanlovi bo’lib o’tdi. Ushbu tadbir an’anaviy ravishda dunyoning turli mamlakatlaridan yosh ijrochilarning e’tiborini o’ziga jalb etib keladi.

Joriy yilda mazkur tadbirda Litva, Qozog’iston, Serbiya, Fransiya va O’zbekistondan kelgan 30 nafardan ziyod musiqachi qatnashdi.

Unda R.Gliyer nomidagi Respublika ixtisoslashtirilgan musiqa akademik litseyi hamda V.Uspenskiy nomidagi Respublika ixtisoslashtirilgan musiqa akademik litseyining o’quvchilari mamlakatimizni namoyon qildilar.

Shuni qayd etish joizki, O’zbekiston musiqa maktablarining barcha tarbiyalanuvchilari ushbu tanlovda muvaffaqiyatli qatnashib, birinchi va sovrinli o’rinlarni qo’lga kiritishdi.

O’z yoshlari toifalarida yosh musiqachilar Karolina Baxteyeva (R.Gliyer nomli litsey) skripkada ijro etish bo’yicha birinchi o’rinni, Sumbur Sarp va Sherzod Baxtiyorov violonchelda ijro etish bo’yicha birinchi o’rinlarni, Farangiz Hidoyatova violonchelda ijro etish bo’yicha ikkinchi o’rinni (V.Uspenskiy nomli litsey) egallashdi.

Bundan tashqari, o’sha kunlari Fransiyaning Gani shahrida bo’lib o’tgan boshqa xalqaro musiqa tanlovida ham o’zbekistonlik yosh musiqachilar muvaffaqiyat qozonishdi. V.Uspenskiy nomidagi Respublika ixtisoslashtirilgan musiqa akademik litseyining talabasi Komila Sultonova hamda Berdax nomidagi musiqa maktabining 7 sinf o’quvchisi Adelya Salixova mazkur tanlovning laureatlari bo’lishib, uchinchi va sovrinli o’rinni egalladilar.

Xalqaro hay’at a’zolarining fikr bildirishlaricha, har tomonlama rivojlangan va barkamol avlodning tarbiyasi yo’lida O’zbekiston Respublikasi hukumati tomonidan ko’rsatilayotgan doimiy e’tibor tufayli o’zbek yosh musiqachilari Fransiyadagi tanlovlarda ajoyib muvaffaqiyatlarni qo’lga kiritib kelishmoqda.

Xalqaro hay’at a’zosi, san’atshunoslik doktori, Vilnyus Musiqa akademiyasining professori Yurges Dvarionas (Litva) “Jahon” axborot agentligiga bergan intervyusida o’zining quyidagi fikr-mulohazalarini bildirdi.

— O’zbekistonlik yosh musiqachilar borgan sari ko’p e’tibor qozonayotganini mamnuniyat bilan qayd etishni istar edim, - dedi u. - Men bu yerda ilk tanlov o’tkazilganidan buyon tadbirning hay’at a’zosi sifatida qatnashib kelaman. Har safar o’zbek yosh musiqachilari va ularning murabbiylari tanlov mukofotlarini qo’lga kirishlari, o’zlarining ajoyib chiqishlari bilan tinglovchilarning olqishiga sazovor bo’lishlari yaxshi an’anaga aylanib qoldi. Bu juda quvonarli holdir. O’zbek musiqachilari nafaqat Markaziy Osiyo mintaqasi, balki Yevropa va jahon miqyosidagi nufuzli mukofotlarni allaqachon qo’lga kiritishgan. Bugungi yakuniy konsertda ham o’zbekistonlik yosh skripka va violonchel cholg’uvchilari o’zlarining juda samimiy chiqishlari bilan barchaning e’tiborini qozonishdi. Ular kata tayyorgarlik bilan kelishgani bilinib turibdi. Ularni katta kelajak kutmoqda, deb o’ylayman.

“Jahon” AA, Parij