“O’ZBEKISTON MINTAQADA TINCHLIKSEVARLIKNI TA’MINLAMOQDA”

Qutlug’ sana - mamlakatimiz davlat mustaqilligining 25 yillik bayrami arafasida xorijiy mamlakatlar ilmiy-akademik doiralari vakillaridan ham respublikamiz xalqiga yo’llangan samimiy tabriknomalarning kelishi davom etmoqda.

Jumladan, Ukraina Tashqi ishlar vazirligi huzuridagi Diplomatiya akademiyasi rektori, xizmat ko’rsatgan maorif xodimi, professor Vyacheslav Sivato‘y “Jahon” axborot agentligi uchun bergan intervyusi chog’ida O’zbekiston Respublikasi xalqini ostonada turgan ushbu muhim bayram bilan chin dildan tabrikladi.

Ekspert o’z murojaatida mamlakatimizning suveren taraqqiyot yillari davomidagi muvaffaqiyatlarining qo’lga kiritilishida O’zbekiston Prezidenti Islom Karimov alohida o’rin tutishini qayd etdi. Uning fikr bildirishicha, mamlakatimiz mustaqillikning dastlabki kunlaridan boshlaboq vazmin, pragmatik tashqi siyosatni olib bormoqda.

Akademiya rektori ta’kidlaganidek, bu davr oralig’ida ijtimoiy-iqtisodiy, siyosiy va demokratik rivojlanish nuqtai nazaridan O’zbekiston salmoqli taraqqiyotga erishdi.

Professor O’zbekistonni Markaziy Osiyoning yetakchi davlati sifatida tilga olar ekan, mamlakatimiz mintaqada tinchliksevarlikni ta’minlayotgani barobarida iqtisodiy barqarorlikni ham qo’llab-quvvatlayotganini alohida ta’kidladi.

Shu bilan birga, Ukraina Diplomatiya akademiyasi rahbari mamlakatimiz aholisiga cheksiz ezgulik, mustahkam tinchlik va farovonlik tiladi.

“Jahon” AA, Kiyev