O’ZBEKISTON VA GOLLANDIYA IKKI YOQLAMA SOLIQQA TORTISHNING OLDINI OLISH KONVENSIYASI TO’G’RISIDAGI PROTOKOLNI IMZOLADI

Gaaga shahrida O’zbekiston va Gollandiya o’rtasidagi Ikki yoqlama soliqqa tortish hamda foyda va mablag’dan soliq to’lashdan bo’yin tovlashning oldini olish bo’yicha 2001-yil 18-oktabrda kuchga kirgan konvensiyaga o’zgartirishlar kiritish to’g’risidagi protokol imzolandi.

Mamlakatimiz degelatsiyasining Gollandiya Moliya vazirligi rahbariyati bilan uchrashuvi chog’ida mezbonlar tomonidan O’zbekiston Nederlandlar Qirolligi uchun Markaziy Osiyo mintaqasidagi muhim ahamiyatga ega bo’lgan davlat ekani ta’kidlandi. Shuningdek, joriy yil mamlakatlarimiz o’rtasida o’zaro manfaatli hamkorlik va hurmat asosida rivojlanib kelayotgan diplomatik munosabatlar o’rnatilganiga 25 yil to’lishi, Gollandiya O’zbekiston bilan Yevropa Ittifoqi doirasida hamkorlik qilishga muhim e’tibor qaratishi alohida qayd etildi. Yevropa Ittifoqi bilan hamkorlik orqali tomonlar iqtisodiyot sohasi, qonun ustuvorligi, ma’muriy boshqaruv va ta’lim masalalari kabi qator muhim yo’nalishlarda birgalikda faoliyat yuritishlariga urg’u berildi.

Muzokaralar yakuniga ko’ra, imzolangan protokol soliq ma’lumotlarini almashish samaradorligini oshirish imkoniyatini berishi va ikki mamlakat o’rtasidagi o’zaro manfaatli savdo-iqtisodiy va sarmoyaviy hamkorlikning yanada mustahkamlanishiga xizmat qilishiga ishonch bildirildi.

Tomonlar shuningdek, Nederlandlar Qirolligi Moliya vazirligi va O’zbekiston Respublikasi davlat Soliq qo’mitasining o’zaro aloqalarni qo’llab-quvvatlash va chuqurlashtirish bo’yicha kelishuvga erishdilar.

“Jahon” AA, Gaaga