O’ZBEKISTONDA YETISHTIRILGAN MAHSULOTLAR ROSSIYALIKLAR DASTURXONIDA

Avval xabar berganimizdek, mamlakatimizning bir qator korxona va kompaniyalari Moskva shahrida bo’lib o’tayotgan oziq-ovqat mahsulotlari, sharbatlar va ularning tayyorlanishi uchun xomashyolar namoyishiga bag’ishlangan XXIV “Prodekspo-2017” xalqaro ko’rgazmasida o’z mahsulotlari bilan qatnashmoqda.

Mamlakatimizda yetishtirilgan ho’l mevalar, sabzavotlar, xilma-xil quruq mevalar va yurtimizda ishlab chiqarilgan sharbatlar va qandolat mahsulotlari namoyish etilayotgan O’zbekiston uchun alohida ajratilgan stend tadbir mehmonlarini befarq qoldirmayapti.

“Jahon” axborot agentligining Moskvadagi muxbiri Rossiya Ulgurji taqsimlash markazlari uyushmasi ijrochi direktori, Oziq-ovqat xavfsizligi akademiyasi haqiqiy a’zosi Vladimir Lishukning bu boradagi mulohazalari bilan qiziqdi:

— Men yana Moskvadagi O’zbekiston “orolchasi”da turganimdan xursandman. To’rt kun avval biz o’zbek dehqon va fermerlari bilan qishloq xo’jalik sohasiga oid uchrashuvlar o’tkazib, Xorazmdan keldik. U yerda bir necha tumanlarda bo’ldik va 12 ming tonna mahsulot sotib olish bo’yicha shartnoma imzoladik.

Hozirgi kunda mamlakatingizda juda ulkan o’zgarishlar amalga oshirilayotgani, Rossiya va O’zbekiston o’rtasidagi munosabatlar yanada mustahkamlanayotgani quvonarlidir.

Oldimizda bahor fasli - ertapishar mahsulotlarni yig’ishtirib olish mavsumi turibdi. Shu ma’noda biz tez orada bizning do’konlarimiz peshtaxtalarida nafaqat Xorazmda, balki Farg’ona vodiysi va O’zbekistonning boshqa hududlarida yetishtirilgan, rossiyaliklar dasturxoniga tortilishi intiqlik bilan kutilayotgan mahsulotlar paydo bo’ladi, deb umid qilamiz.

Rossiyada saxovatli o’zbek zaminining hadyalarini ko’rish va iste’mol qilish xalqimizga doimo xursandchilik baxsh etadi.

“Jahon” AA, Moskva