«O’ZBEKISTONGA QILINGAN UNUTILMAS SAFAR»

SMG Xalqaro Shanxay teleradiokanali mediaguruhi ikki qismdan iborat «O’zbekistonga qilingan unutilmas safar» nomli hujjatli filmni tasvirga oldi. Ushbu film yurtimizning noyob tarixiy merosi va sayyohlik salohiyatiga bag’ishlangan. Respublikamiz mazkur nufuzli media guruhni e’tiborini jalb qilgan MDH mamlakatlarida birinchi mamlakat bo’ldi.

Film ilk bor eng mashhur ko’ngilochar dasturlar reytingida birinchi o’rinni egallab turgan «Getaway» dasturida namoyish etildi.

Birinchi qism tomoshabinlarni Toshkent, Buxoro va Xivaning madaniy va ma’naviy qadriyatlari, me’moriy obidalari bilan tanishtiradi .

Kinotasvirda qayd etilishicha, O’zbekiston Markaziy Osiyoning yuragida joylashgan bo’lib, Toshkent, Xiva, Buxoro va Samarqand ajoyib tarix va madaniyat boy shaharlar hisoblanadi.

Filmda sayohat 20 yildan ortiq vaqt davomida Shanxayning birodar-shahri hisoblangan poytaxtimizdan boshlanadi. «Uning tarixi 2200 yildan oshgan. Bu yerda o’tmishning diqqatga sazovor noyob tarixiy va zamonaviy inshootlar uyg’unlashib ketgan. Shahardagi "Chorsu" bozori sayyohlarda o’chmas taassurot qoldiradi. Mazkur gumbazsimon bozor ming yillik tarixga ega bo’lib, kundalik mahalliy hayotni aks ettiruvchi eng yaxshi joy hisoblanadi», - deya ta’kidlanadi filmda.

Qadimiy Xiva shahri haqida so’z yuritar ekan, bu ochiq – osmon ostidagi muzey, asrlar davomida Buyuk ipak yo’lida eng yirik savdo markazi bo’lib kelgan – deya hikoya qiladi mualliflar. "1991-yilda O’zbekistonda aynan shu shahar birinchi bo’lib UNESCO Jahon merosi ro’yxatiga kiritilgani tasodif emas. Ikki yarim ming yillik ulug’ yoshga qaramasdan, bu yerda betakror me’moriy obidalarning katta qismi saqlanib qolgan. Xususan, Juma masjidi katta qiziqish uyg’otadi. Rang-barang shakl va naqshlar solingan mahobatli 213 ustun bu yerda yog’och o’ymakorlik san’ati yaxshi rivojlanganidan dalolat beradi",- deya e’tirof etilgan filmda.

Xitoy jurnalistlar uchun keyingi bekat Buxoro bo’ldi. Ularning shahar bilan tanishuvi Buxoro raqqoslarini ajoyib ijrosini kuzatish bilan boshlangan.

Buxoro haqidagi hikoya davom etgan va Sharq marvaridi - Samarqand haqidagi ma’lumotlardan iborat filmning ikkinchi qismi noyabr boshida namoyish qilinadi.

«Jahon» AA