O’ZBEKISTONNING EKSPORT SALOHIYATI KIYEVDA NAMOYISH ETILDI

Ukraina poytaxtida «IWCK Charity Bazaar» xalqaro ayollar klubining XXIV yillik ko’rgazmasi bo’lib o’tdi. Unda O’zbekistonning eksport salohiyati taqdim etildi.

Tadbir davlatlarning namoyishlari bilan ochildi. Uning ishtirokchilari o’z mamlakatlarining an’anaviy musiqalari sadosi ostida tanishtirildi. U yerda, jumladan, «Andijon polkasi» ham yangradi.

Ko’rgazma doirasida O’zbekiston milliy stendi tashkil etildi. Tadbir mehmonlari uchun bu yerda o’zbek xalqining o’ziga xos va rang barang madaniyati, pazandachilik namunalari va san’ati, shuningdek, sanoat va to’qimachilik, milliy maishiy texnika mahsulotlari hamda o’zbek xalq ustalari tomonidan yasalgan kulolchilik buyumlari namoyish etildi.

O’zbekiston stendi mehmonlariga mamlakatimizning sayyohlik salohiyati, tarixiy me’moriy obidalari, o’zbek xalqining boy ma’naviy va madaniy merosi haqida batafsil ma’lumot berildi. Ular mamlakatimizda yetishtirilgan meva va poliz mahsulotlaridan bahramand bo’lishdi. Mehmonlar, shuningdek, O’zbekistonning Ukrainadagi elchixonasi kolleksiyasida bo’lgan o’zbek musavvir va haykaltaroshlarining asarlari bilan tanishib, Vatanimiz haqidagi o’z taassurotlarini boyitish imkoniyatiga ega bo’ldilar.

Ko’rgazma ishtirokchilari o’zbek to’qimachilik sanoati namunalari va o’z mahsulotlarini Ukraina bozorida sotilishini yo’lga qo’ya boshlagan ARTEL kompaniyasining maishiy texnikalariga yuqori baho berishdi.

“Jahon” AA, Kiyev