ODDIY BICHUVCHILIKDAN ZAMONAVIY DIZAYNERLIKKA

O‘zbekiston Savdo-sanoat palatasi va BMT Taraqqiyot dasturining qo‘shma loyihasiga muvofiq Namangan shahridagi “Istiqlol dizayn markazi” mas’uliyati cheklangan jamiyati qoshida liboslar dizayni konstruktorlik markazi ochildi.

Shu munosabat bilan tashkil etilgan tadbirda O‘zbekiston Savdo-sanoat palatasi raisi A.Shayxov, BMTning mamlakatimizdagi doimiy muvofiqlashtiruvchisi, BMT Taraqqiyot dasturining doimiy vakili Stefan Prisner va boshqalar Prezident Islom Karimov rahnamoligida kichik biznes va xususiy tadbirkorlikni rivojlantirishga qaratilayotgan alohida e’tibor yengil sanoat, xususan, to‘qimachilik va tikuvchilik sanoatining jadal taraqqiy etishiga xizmat qilayotganini ta’kidladi. Bu jarayonda kadrlar salohiyatini yuksaltirish, ishlab chiqarishni kengaytirish va mahsulot sifatini yanada yaxshilashga alohida e’tibor qaratilmoqda.

Prezidentimiz 2011-yilda Namangan viloyatiga tashrifi chog‘ida erkaklar mavsumiy liboslari tikishga ixtisoslashgan “Istiqlol” korxonasi jamoasi bilan uchrashuvida insonning hamma narsasi – qalbi ham, tashqi ko‘rinishi ham, kiyimi ham go‘zal bo‘lishi kerakligi, libos – inson ziynati ekanini, bugun xalqimizning, ayniqsa, yoshlarimizning kiyinishga, kiyim tanlashga bo‘lgan e’tibori, ehtiyoji va talabi tamomila o‘zgarganini ta’kidlab, bu borada o‘sib borayotgan talabni yurtimizda ishlab chiqarilgan zamonaviy va sifatli mahsulotlar hisobidan qondira oladigan korxonalarni ko‘paytirish, yosh, iste’dodli, zamon talabi, bozor ehtiyojini puxta biladigan mutaxassislar tayyorlash xususida alohida tavsiyalar bergan.

– Bugun korxonamiz qoshida ochilgan mazkur liboslar dizayni konstruktorlik markazi davlatimiz rahbari tomonidan berilgan ko‘rsatmalarning amaliy ifodasidir, – deydi “Istiqlol dizayn markazi” mas’uliyati cheklangan jamiyati rahbari Baxtiyor Umarov. – Qiymati 47 ming dollarga teng mazkur loyihaga asosan markaz zamonaviy komputer va boshqa jihozlar bilan ta’minlandi. Bu korxonada libos bichish, yangi model va dizaynlar yaratishning tezkor, qulay va zamonaviy tizimini yaratish imkonini beradi.

– Shu paytgacha bichish ishlari qo‘lda, ya’ni chizg‘ichlar yordamida bajarilar, yangi yaratilgan libosni manekenga kiydirib ko‘rilmaguncha kamchilik va nuqsonlarini bilib bo‘lmasdi, – deydi modelyer-konstruktor Dilobar Hayitboyeva. – Endi bu jarayonlar SAD dasturi, 3D-modellashtirish, raqamlashtirish, eskizlarni real hajmda bosib chiqarish orqali modellarni tuzish ishlari yuqori texnologiyali komputerlashtirilgan tizim yordamida tezkorlik bilan bajariladi.

Markazda yiliga 50 ga yaqin kasb-hunar kolleji o‘quvchilarini o‘quv-ishlab chiqarish amaliyotiga jalb etish rejalashtirilmoqda. Bu viloyatdagi tikuvchilik korxonalarini zamonaviy mutaxassislar bilan ta’minlashda muhim ahamiyat kasb etadi. Loyihaga ko‘ra, o‘quv amaliyoti davrida o‘zini namoyon etgan o‘n nafar o‘quvchi “Istiqlol dizayn markazi” korxonasida ish bilan ta’minlanadi.

Ishtirokchilar liboslar dizayni konstruktorlik markazi imkoniyatlari bilan tanishdi.

Tadbirda Namangan viloyati hokimi X.Bozorov so‘zga chiqdi.

O’zA