Рим кўп йиллардан буён Ўзбекистонга минтақадаги муҳим давлат сифатида катта қизиқиш билдирмоқда

Италиянинг етакчи босма ва электрон оммавий ахборот воситалари Бош вазир Жоржа Мелонининг Ўзбекистонга ташрифи тафсилотларини кенг ёритмоқда, деб хабар қиляпти "Дунё" АА мухбири.

Хусусан, италян тилидаги "Il Giornale" газетаси, "Adnkronos" ва "Nova News" электрон нашрлари ҳамда Италиянинг етакчи ахборот агентликлари ва телеканаллари ташриф тафсилотлари ҳамда унинг доирасида ўтказилган олий даражадаги икки томонлама музокаралар якунларини ва эришилган келишувлар ҳақидаги хабарларни тезкорлик билан кенг жамоатчилик эътиборига тақдим этиб борди.

Ушбу мавзуга бағишланган мақолалар ва таҳлилий шарҳларда Италия Бош вазирининг Ўзбекистонга ташрифи олқишланар экан, бу воқеа икки томонлама ҳамкорликни ривожлантириш, жумладан, савдо-иқтисодий, сармоявий, маданий-гуманитар ва бошқа соҳаларда қўшма дастур ҳамда лойиҳаларни амалга оширишда ҳал қилувчи аҳамият касб этишига ишонч билдирилган.

Жумладан, "Il Giornale" газетасида босилган "Мелонининг Ўзбекистонга ташрифи: Рим ва Тошкент ўртасидаги 500 миллион евролик стратегик ҳамкорликка янги туртки" сарлавҳали мақолада 28-30-май кунларига мўлжалланган Ўзбекистон ва Қозоғистонга ташриф муҳим стратегик аҳамиятга эга экани, Италиянинг Марказий Осиё минтақасига қизиқиши ортиб бораётгани қайд этилган.

Нашрда таъкидланишича, расмий Рим ва Тошкент ўртасидаги иқтисодий алоқалар кун тартибининг марказида. 2024 йилда икки давлат ўртасидаги товар айирбошлаш ҳажми 500 миллион еврога етди. Бу рақамлар Италия ва Ўзбекистон ўртасидаги икки томонлама алоқалар фаоллиги ва жадал ривожланаётганини тасдиқлайди. 2024 йил давомида Италиянинг Ўзбекистонга киритган тўғридан-тўғри сармояси ўтган йилга нисбатан 160 фоизга ошди .

"Il Giornale" нашрининг ёзишича, Ўзбекистонда 55 дан ортиқ италян компанияси, жумладан, энергетика, металлургия, тўқимачилик ва агросаноат каби муҳим тармоқларда фаолият юритмоқда.

Италия ОАВга кўра, ушбу ташриф 2023 йил июнь ойида Ўзбекистон Президенти Шавкат Мирзиёевнинг Римда Президент Сержо Маттарелла ва Бош вазир Мелони билан учрашувлар чоғида қабул қилинган стратегик шериклик муносабатларидаги навбатдаги қадам бўлади.

"Ўшандан буён икки томонлама муносабатлар сезиларли даражада фаоллашди. Ўша йилнинг ноябрь ойида Президент Сержо Маттарелла Тошкентда расмий ташриф билан бўлиб, икки давлат ўртасидаги дўстликни мустаҳкамлаш бўйича олий даражада музокаралар ўтказди. Ушбу икки томонлама олий даражадаги ташрифлар натижасида ўн бешта ҳукуматлараро шартнома имзоланди ва уларни амалга ошириш бўйича чора-тадбирлар режаси ишлаб чиқилди",– деб урғуланган мақолада.

Ташриф арафасида "Il Giornale" газетаси, шунингдек, "Италия-Ўзбекистон" савдо-саноат палатаси президенти Жоржио Веронези билан суҳбатни эълон қилди.

Интервью аввалида "Италия – Ўзбекистон" савдо-саноат палатаси 2002 йилдан буён фаолият юритиб келаётгани ва унинг офислари Милан ва Тошкентда очилгани таъкидланган. Палата раҳбари интервью давомида Италия ва Ўзбекистон компаниялари ўртасидаги ҳамкорликнинг энг истиқболли йўналишларини санаб ўтган. Улар орасида анъанавий йўналишлардан ташқари, кўплаб Италия компаниялари фаол ишлаётган нефть ва газ, нефть-кимё, энергетика ва тўқимачилик соҳалари ҳам бор. Бундан ташқари, муқобил энергия, тоғ-кон саноати, озиқ-овқат саноати, фармацевтика соҳаларида ҳам катта имкониятлар мавжуд.

"Палатамиз Италия компанияларини Ўзбекистонга сармоя киритишга чақирмоқда. Лекин Ўзбекистон ҳақида ҳалигача кам маълумотга эга. Биз мамлакатнинг савдо-саноат имкониятлари, шунингдек, эътиборга олиниши лозим бўлган ҳуқуқий, молиявий ва шартномавий жиҳатлар каби шартлар ҳақида аниқ маълумотларни тақдим этиш учун барча имкониятларни ишга солаяпмиз", – дея қайд этган Жоржио Веронези.

Шунингдек, у Ўзбекистонда амалга оширилаётган кенг кўламли иқтисодий ислоҳотларни баҳолар экан, улар Италия бизнеси, хусусан, савдо-саноат кооперацияси учун янги имкониятлар очаётганига урғу берган.

Италиянинг оммабоп "Adnkronos" нашри эса "Италия-Ўзбекистон, Жоржа Мелони Самарқандга ташриф буюрди ва Ўзбекистон кўчаларида Италия байроғи ҳилпирамоқда" сарлавҳали мақолани ўз ўқувчилари эътиборига тақдим қилди.

Қайд этилишича, бир пайтлар буюк сулолалар пойтахти ва Буюк ипак йўлидаги муҳим савдо маркази бўлган Самарқанд шаҳри ҳанузгача ўзининг бетакрор тарихий жозибасини сақлаб келмоқда. Муаллиф ёзганидек, бугунги кунда Самарқанд нафақат Ўзбекистоннинг маданий дурдонаси, балки 2001 йилдан бери ЮНЕСКОнинг Умумжаҳон мероси рўйхатига киритилган. Бу унинг жаҳон тарихи ва меъморчилигига қўшган беқиёс ҳиссаси эътирофидир.

"Италия Бош вазири Жоржа Мелонининг Президент Шавкат Мирзиёев билан учрашуви Ўзбекистон раҳбарининг 2023 йил июнь ойида Италияга расмий ташрифи чоғида эришилган келишувларнинг мантиқий давомидир. Ўшанда икки давлат ўртасидаги стратегик шериклик муносабатларининг бошланишини кўрсатувчи Қўшма декларация имзоланган эди. Ташриф чоғида иқтисодиёт, таълим, туризм ва маданият каби соҳаларни қамраб олган кўплаб ҳукуматлараро битимлар имзоланди", – дея урғулаган "Adnkronos" мақоласида.

"Nova News" нашрида жойлаштирилган материалда Италия ҳукумати раҳбарининг Ўзбекистонга деярли ўттиз йил ичида – 1997 йилдан бери, ўша пайтдаги Бош вазир Романо Проди ташрифдан кейинги биринчи ташрифи эканлиги хабар қилинган.

Унда Ўзбекистон минтақадаги муҳим давлат эканлиги, республикага кўп йиллардан буён расмий Рим катта қизиқиш билдираётгани таъкидланади. "Шарқ ва Ғарб чорраҳасида жойлашган ушбу минтақа фойдали қазилмаларга бой бўлиб, инвесторлар учун кенг имкониятлар яратади, – дейилган мақолада.

Нашрда 2024 йилда Италия ва Ўзбекистон ўртасидаги товар айирбошлаш ҳажми 455 миллион долларни ташкил этгани, бироқ экспертларнинг фикрича, иқтисодий ҳамкорликни мустаҳкамлаш бўйича салоҳият тўлиқ очилмагани алоҳида қайд этилган.

"Италиялик инвесторлар учун энг истиқболли тармоқлар тўқимачилик, агросаноат, металлга ишлов бериш, шунингдек, энергетика ва тоғ-кон саноати, инфратузилма, транспорт, ипакчилик ва туризмдир. Италия компаниялари, шунингдек, Бухоро ва Самарқанд ўртасидаги "Навоий" зонаси каби махсус иқтисодий зоналарга ҳам қизиқиш билдирмоқда, бу ерда инвесторларга солиқ имтиёзлари ва соддалаштирилган маъмурий тартиб-қоидалар таклиф этилади", – деб ёзган "Nova News".