“SAHRO DURDONASI”

Shveysariyada nashr etiladigan “Diva International Diplomat” jurnalining navbatdagi sonida ana shunday sarlavha ostida mamlakatimizning eng diqqatga sazovor maskanlaridan biriga aylangan Nukus shahrining Igor Savitskiy nomidagi Davlat san’at muzeyiga bag’ishlangan maqola bosilib chiqdi.

Unda ma’lum qilinganidek, mazkur muzey me’moriy durdonalar va folklor, xalq amaliy san’ati va zamonaviy san’at asarlari bo’yicha Markaziy Osiyoning eng yirik to’plamlaridan biriga ega.

“Buyuk Britaniyaning “The Guardian” gazetasi uni dunyodagi eng mashhur muzeylardan biri sifatida e’tirof etgan. Bugungi kunda ushbu muzeyda taxminan 90 ming asar, jumladan, tasviriy asarlar, surat va haykallar, Xorazmning qadimiy tamaddunidan boshlab to zamonaviy o’zbek va qoraqalpoq rassomlari ijodiga mansub minglab to’qimachilik va zargarlik buyumlari mavjud”, deb yozadi jurnal.

Maqolada Igor Savitskiyning tarjimai holi va uning ilg’or rassomlar ijodini saqlab qolish borasidagi sa’y-harakatlariga alohida e’tibor qaratilgan. “Mazkur soha mutaxassislarining ta’kidlashlaricha, bu san’atning tarixi ushbu to’plamdagi topilmalar munosabati bilan qayta yozilgan bo’lishi mumkin. Sahro odamlari va madaniyati bilan jiddiy qiziqqan Igor Savitskiy qoraqalpoq gilamlari, liboslari, qimmatbaho zeb-ziynatlari va boshqa san’at asarlarini qunt bilan to’plagan. Shu bilan bir vaqtda, u Markaziy Osiyo bilan bog’liq bo’lgan mualliflar suratlari, shuningdek, mashhur rus rassomlarining ijodi bilan ham qiziqqan”, deya xabar beradi “Diva International Diplomat”.

Shu o’rinda ta’kidlanishicha, Igor Savitskiyning nafaqat eng yaxshi asarlarni, balki tajriba shaklidagi ijod namunalarini ham to’plashga yondashuvi uning g’ayrioddiy jihatlaridan biri hisoblanadi.

“Jahon” AA, Jeneva