“Salomatlik” poyezdi xizmatidan aholi mamnun

“Sog‘lom avlod uchun” xalqaro xayriya fondi va “O‘zbekiston temir yo‘llari” davlat aksiyadorlik kompaniyasi hamkorligida tashkil etilgan “Salomatlik” poyezdi shifokorlari Navoiy viloyatida salomatlik kunlarini o‘tkazmoqda.

Tibbiy ko‘riklarga viloyat markazidan olisda joylashgan qishloq va ovullarda yashovchi hamda alohida parvarishga muhtoj aholi qatlami jalb etilmoqda.

– Mamlakatimizda aholi salomatligini mustahkamlash, chekka hududlarda istiqomat qiluvchi insonlarga yuqori darajada tibbiy xizmat ko‘rsatishga alohida e’tibor qaratilmoqda, – deydi “O‘zbekiston temir yo‘llari” kompaniyasining sog‘liqni saqlash xizmati shifokori Munira To‘rayeva. – “Salomatlik” tibbiy-sanitar poyezdimiz ham shu maqsadda tashkil etilgan. Tekshiruvlar jarayonida keksalar, bolalar va yosh onalarga alohida e’tibor qaratilayotir. Bunda bizga mahalliy shifokorlar yaqindan ko‘maklashmoqda.

Tadbir davomida aholiga oziq-ovqat, kiyim-kechak, dori-darmon, tibbiy anjom hamda sanitariya-gigiyena vositalaridan iborat muruvvat yordamlari ko‘rsatilmoqda.

– Ko‘pdan buyon bosh og‘rig‘i bezovta qilardi. Turmush tashvishlari bilan bo‘lib shifokorga borishga hafsala qilmay yurgandim, – deydi Tinchlik qo‘rg‘onida yashovchi Rohila Safarova. – “Salomatlik” poyezdida malakali shifokorlar aholini tibbiy ko‘rikdan o‘tkazayotganini eshitib xursand bo‘ldim. Tibbiy ko‘rikka kelib, zarur maslahatlar oldim. Bunday e’tibor va g‘amxo‘rlikdan behad minnatdormiz.

“Salomatlik” poyezdi shifokorlari Navoiy, Tinchlik, Konimex, Qara-Qata, Mustaqillik, Qizilquduq, Buzaubay va Uchquduq stansiyalari atrofidagi hududlarda yashovchi aholini chuqurlashtirilgan tibbiy ko‘rikdan o‘tkazmoqda.

www.uza.uz