SAYLOVGA TAYYORGARLIK MASALALARI ATROFLICHA MUHOKAMA QILINDI

Tadbirkorlar va ishbilarmonlar harakati – O‘zbekiston liberal-demokratik partiyasi Samarqand viloyati kengashining konferensiyasida joriy yil 4-dekabrda bo‘ladigan O‘zbekiston Respublikasi Prezidenti saylovida partiyaning ishtiroki bilan bog‘liq masalalar muhokama etildi.

Anjuman qatnashchilari saylovni yuqori saviyada o‘tkazish yuzasidan amalga oshirilayotgan ishlarni tahlil etib, galdagi vazifalarga e’tibor qaratdi. Joylardagi saylov shtablarining to‘laqonli faoliyat yuritishiga erishish, saylov qonunchiligi yuzasidan keng jamoatchilik o‘rtasida targ‘ibоt tadbirlari olib borish bo‘yicha chora-tadbirlar belgilandi.

– Bugungi kunda 1060 boshlang‘ich tashkilotda 30 mingga yaqin a’zoni birlashtirgan partiya viloyat kengashi ham tashkilotimizning saylovda muvaffaqiyatli ishtirok etishi uchun zarur chora-tadbirlarni ko‘rmoqda, – deydi partiya viloyat kengashi raisi o‘rinbosari I.Bоtirov. – Shu vaqtga qadar tuman va shaharlarda partiyaning hududiy konferensiyalari o‘tkazilib, partiyadan ko‘rsatiladigan nomzod, elektoratimiz manfaatlarini to‘la ifodalaydigan dastur tayyorlash masalalari muhokama etildi. Partiyamiz siyosiy kengashining joriy yil 16-sentabr kuni bo‘lib o‘tgan majlisidagi qarorlar yakdillik bilan qo‘llab-quvvatlandi.

Konferensiyada partiyaning VIII syezdiga Samarqand viloyatidan delegatlar saylandi.

O’zA