“SHARQ TARONALARI” UMRIMIZNING OXIRIGACHA XOTIRALARIMIZDA O’CHMAS IZ QOLDIRISHIGA ISHONCHIMIZ KOMIL”

Bu yil o’ninchi marotaba o’tkaziladigan “Sharq taronalari” Xalqaro musiqa festivalida Hindistondagi “Dilrang” mumtoz vokal guruhi hind xalqining o’ziga xos san’ati namunalarini namoyish etadi.

Mumbay shtatida bir necha yillardan buyon faoliyat yuritib kelayotgan mazkur guruhning badiiy rahbari va yakkaxon xonandasi Vajohat Husayn Xon O’zbekistonga safari oldidan Samarqand shahrida bo’lib o’tadigan xalqaro musiqa bayramining ahamiyati va kutayotgan natijalari haqidagi fikrlarini “Jahon” axborot agentligi muxbiriga bayon etdi.

— Shu paytga qadar qator xalqaro musiqa festivallarida qatnashganimga qaramay, “Sharq taronalari”da hind san’atini namoyish etish meni hayajonga solayotganini yashira olmayman, - dedi u. - Bu bejiz bo’lmasa kerak. Negaki bugun “Sharq taronalari” festivali dunyodagi eng yirik xalqaro musiqa anjumanlaridan biridir. Unda Yer sharining 60 dan ortiq mamlakatidan keladigan eng kuchli, tanlangan san’at ustalari o’z mahoratlarini namoyon etishadi. Qolaversa, O’zbekistonning tarixiy go’shalari, xususan, Samarqand men uzoq yillardan buyon ziyorat qilishni orzu qilgan shahar sanaladi.

Bugungi O’zbekiston zamini Abu Ali ibn Sino, Imom Buxoriy, Al Beruniy, Al Farg’oniy, Mirzo Ulug’bek, Alisher Navoiy kabi ko’plab buyuk alloma va mutafakkirlarga beshik bo’lgan, ularni tarbiyalagan qutlug’ zamindir. Ular dunyo ilm-fani, madaniyat va ma’naviyat, davlatchilik, shaharsozlik va san’at rivojiga bebaho hissa qo’shganlar.

Bugungi kunlarda yurtingizda mintaqaviy va xalqaro ahamiyatga ega bo’lgan masalalar, sud-huquq, tibbiyot, maorif, qishloq xo’jaligi kabi sohalar taraqqiyotiga xizmat qiladigan yirik ilmiy va amaliy anjumanlar jahon olimlari va mutaxassislari ishtirokida tez-tez o’tkazib kelinayotir. “Sharq taronalari” kabi nufuzli san’at forumining tashkil etilgani ham tabarruk yurtda tarixiy-ma’naviy an’analar bardavom ekanligidan dalolat beradi.

“Sharq taronalari” sahnasida ijro etadigan madaniy dasturimizdan Jaloliddin Rumiy, Abdurahmon Jomiy, Xisrav Dehlaviy kabi Sharqning yetuk shoirlarining g’azallari asosida kuyga solingan qo’shiqlar o’rin olgan. Bizlar uchun xalqimiz san’atini dunyo jamoatchiligi vakillari oldida namoyish etish imkoniyatini yaratib bergan anjuman tashkilotchilariga o’z minnatdorligimizni bildiramiz. Umid qilamizki, chiqishlarimiz O’zbekiston xalqi va festival hay’ati a’zolari tomonidan munosib baholanadi va biz yurtimizga muvaffaqiyatlar bilan qaytamiz. “Sharq taronalari” umrimizning oxirigacha xotiralarimizda o’chmas iz qoldirishiga ishonchimiz komil.

«Jahon» AA, Dehli