SHARQONA JILOLAR

Toshkent Fotosuratlar uyi doimo muxlislar bilan gavjum. Bu yerda O‘zbekiston Badiiy akademiyasi bilan hamkorlikda ochilgan "Sharqona jilolar" ko‘rgazmasida yosh ijodkorlar Ulug‘bek Rajabov va Farrux Mavlonovning manzara, Abdumajid Soatovning tarixiy, Jamshid Chorshanbiyev va Bunyod Karimovning portret janrlaridagi asarlari, Bоtir Hakimovning haykaltaroshlik ishlaridan namunalar namoyish etilmoqda.

Ijodkorlarning "Kuz", "G‘ilon navosi", "Oltin kuz", "Sarchashmada kuz", "Quyoshli kun", "Oqshom", "Bizning ko‘cha", "Nastarin", "Tandir", "Fevral", "Ozodlik navosi", "Karnaychi" kabi asarlarida yurtimiz qishloqlari jamoli, serquyosh o‘lka tafti yorqin va sharqona jilolarda aks ettirilgani kishini befarq qoldirmaydi.

Kamoliddin Behzod nomidagi Milliy rassomlik va dizayn instituti rektori H.Aminov va boshqalar mamlakatimizda yosh avlod kamolotiga qaratilgan doimiy e’tibor ularning zamonaviy bilim va kasb-hunarlarni egallashi, iste’dod va salohiyatini namoyon etishida yuksak samaralar berayotganini ta’kidladi.

Birinchi Prezidentimizning 2014-yil 6-fevraldagi “O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida”gi qarori yosh iste’dodlarni kashf etish va rag‘batlantirishda muhim dasturilamal bo‘layotir.

– Mamlakatimizda ijodkorlarga erkin va samarali mehnat qilish, iste’dodini namoyon etishi uchun keng imkoniyatlar yaratilgan, – deydi san’atshunos Madina Oripova. – Bugun asarlari namoyish qilinayotgan yosh ijodkorlarning har birida o‘ziga xos uslubni ko‘rish mumkin. Abdumajid Soatov akademik san’at an’analariga amal qilsa, Farrux Mavlonov va Ulug‘bek Rajabov ijodida manzara janri muhim o‘rin egallaydi. Bunyod Karimov o‘z asarlarida inson ehtiros va kechinmalarini talqin qiladi. Jamshid Chorshanbiyev ijodining asosiy mavzusi o‘zi tug‘ilib o‘sgan G‘ilon qishlog‘iga bag‘ishlanadi. Iste’dodli yosh haykaltarosh Bоtir Hakimov naturani to‘g‘ridan-to‘g‘ri tasvirlashdan chekinib, g‘oyasini ramzlar vositasida ifodalaydi.

Rangtasvirchi Ulug‘bek Rajabov poytaxtimizdagi Chilonzor matbaa kasb-hunar kollejida faoliyat ko‘rsatadi. U nafaqat yoshlarga kasb sirlaridan saboq beradi, balki o‘z ustida tinmay izlanib, turli ko‘rgazmalarda ishtirok etadi.

– Mamlakatimizda milliy ma’naviyatimizni yuksaltirish, navqiron avlodni Vatanga muhabbat, istiqlol g‘oyalariga sadoqat, milliy va umuminsoniy qadriyatlarga hurmat ruhida tarbiyalashga alohida ahamiyat qaratilmoqda, – deydi U.Rajabov. – Albatta, bunday e’tibor bizni ijodga undaydi.

Ko‘rgazmada 70 ga yaqin rangtasvir va haykaltaroshlik ishlari muxlislar e’tiboriga havola etilgan.

O’zA