“SHIROQ” SPEKTAKLI – FESTIVAL G‘OLIBI

O‘zbek Milliy akademik drama teatrida Yoshlar haftaligi doirasida tashkil etilgan talabalar teatr-studiyalari festivali g‘oliblari tantanali taqdirlandi.

“Kamolot” yoshlar ijtimoiy harakati, O‘zbekiston Respublikasi Oliy va o‘rta maxsus ta’lim, Madaniyat va sport ishlari vazirliklari, “O‘zbekteatr” ijodiy-ishlab chiqarish birlashmasi hamkorligida uyushtirilgan tadbirda mas’ul tashkilotlar vakillari, san’atshunos olimlar, talaba-yoshlar, teatr ixlosmandlari va ommaviy axborot vositalari xodimlari ishtirok etdi.

Oliy va o‘rta maxsus ta’lim vazirining birinchi o‘rinbosari I.Majidov, madaniyat va sport ishlari vaziri o‘rinbosari, “O‘zbeknavo” estrada birlashmasi bosh direktori F.Jo‘rayev, O‘zbek Milliy akademik drama teatri direktori F.Ma’sudov va boshqalar “Ertangi kun bizniki, marra bizniki!” shiori ostida o‘tkazilgan festival yoshlarni teatr san’atining sirli olami bilan tanishtirish, ular qalbida Vatanga muhabbat, milliy qadriyatlarga sadoqat tuyg‘ularini qaror toptirish, yosh aktyorlarning mahoratini toblashda muhim ahamiyat kasb etganini ta’kidladi.

Festivalda Berdaq nomidagi Qoraqalpoq davlat universiteti, Toshkent axborot texnologiyalari universitetining Nukus filiali, Qarshi davlat universiteti, Navoiy davlat konchilik instituti, Mirzo Ulug‘bek nomidagi O‘zbekiston Milliy universiteti, Toshkent to‘qimachilik va yengil sanoat instituti talabalar teatr jamoalari qatnashdi.

Spektakl g‘oyasi, sahna bezaklari va talabalarning ijro mahoratini taniqli san’atshunoslar, teatrshunoslar, xalqimiz ardog‘idagi aktyorlar baholadi.

Hakamlar hay’ati tomonidan Qarshi davlat universiteti teatr jamoasining vatanparvarlik, xalqsevarlik, ajdodlar ruhiga sadoqat, or-nomus, adolat g‘oyalari chuqur talqin etilgan “Shiroq” spektakli g‘olib, deb topildi.

G‘olib jamoa a’zolariga diplom va sovg‘alar berildi. Tadbirda faol jamoalar hamda eng yaxshi rol ijrochilari turli nominatsiyalar bo‘yicha taqdirlandi.

"Shiroq" spektakli O‘zbek Milliy akademik drama teatrida namoyish etildi.

O’zA