SIRLI TASVIRLAR

Alisher Navoiy nomidagi O‘zbekiston Milliy kutubxonasida O‘zbekiston xalq rassomi Akmal Nur bilan ijodiy uchrashuv tashkil etildi. Unda rassomlar, san’atshunoslar, professor-o‘qituvchilar, talaba-yoshlar ishtirok etdi.

Tadbirda Akmal Nur ijodiga bag‘ishlangan hujjatli film namoyish etildi. Rassomning Italiyada chop etilgan rasmlar katalogi taqdimoti o‘tkazildi. Unda ijodkorning turli yillarda yaratgan asarlari jamlangan. Mazkur nashr nafaqat musavvir ijodi, balki O‘zbekiston tasviriy san’atining barcha yo‘nalishlarini aks ettirgani bilan ham ahamiyatlidir.

– Akmal Nur ijodi o‘zbek zamonaviy tasviriy san’atida alohida o‘rin tutadi, – deydi san’atshunoslik fanlari doktori Kamola Ortiqova. – Yengil chizgilar zamirida poetik chiroy va ramziy obrazlar, sharqona o‘y-fikr va majoziy sirlar yotadi. Rassom o‘z asarlarida sevgi mavzusiga ham katta e’tibor qaratgan.

Akmal Nur asarlari nafaqat mamlakatimiz, balki AQSh, Xitoy, Rossiya, Germaniya, Fransiya, Niderlandiya, Hindiston, Marokash, Isroil singari mamlakatlarning muzey va galereyalarida saqlanmoqda.

Tadbirda ishtirokchilar o‘zlarini qiziqtirgan savollarga javob oldi.

O’zA