TAYYORGARLIK ISHLARI MUHOKAMA QILINDI

O‘zbekiston Respublikasi Prezidenti saylovini o‘tkazuvchi 6-Namangan okrug saylov komissiyasining navbatdagi yig‘ilishida joriy yil 4-dekabrda o‘tkaziladigan O‘zbekiston Respublikasi Prezidenti sayloviga tayyorgarlik ko‘rish jarayonlari, saylovni yuqori saviyada, demokratik tamoyillar asosida o‘tkazishning tashkiliy masalalari muhokama qilindi.

Yig‘ilishda viloyat xalq ta’limi, o‘rta maxsus, kasb-hunar ta’limi boshqarmalari, “Namangan hududiy elektr tarmoqlari korxonasi” aksiyadorlik jamiyati, “O‘zbektelekom” aksiyadorlik kompaniyasi Namangan filiali va boshqa mutasaddi tashkilotlar rahbarlarining joylarda olib borilayotgan saylovga tayyorgarlik ishlari to‘g‘risidagi axboroti tinglandi.

Viloyatda tashkil etilgan 690 saylov uchastkasida tegishli saylov qonunchiligi talablari asosida uchastka saylov komissiyalarining samarali faoliyat ko‘rsatishi, saylov kuni ovoz beruvchilar uchun barcha zarur sharoit yaratish bo‘yicha mahalliy hokimliklar bilan hamkorlikda belgilangan chora-tadbirlar asosida ish olib borilayotgani ta’kidlandi. Saylov uchastkalari, ijtimoiy, iqtisodiy obyektlarda elektr ta’minoti uzilishlariga yo‘l qo‘ymaslik, sifatli va tezkor aloqa xizmati ko‘rsatilishini ta’minlash, hududlarni obodonlashtirish, saylov uchastkalarini talab darajasida jihozlash choralari ko‘rilmoqda.

– Tuman va shahar elektr ta’minoti korxonalari tomonidan hududlardagi barcha transformatorlar qayta ko‘rikdan o‘tkazilib, aniqlangan nosozliklar bartaraf etilmoqda, – deydi “Namangan hududiy elektr tarmoqlari korxonasi” aksiyadorlik jamiyati rahbari o‘rinbosari Sayfiddin Husainov. – Tizimda saylovga tayyorgarlik va saylov kunlarida kunu tun xizmat ko‘rsatuvchi 15 navbatchi guruh va 32 tezkor xizmat ko‘rsatuvchi sayyor guruh tashkil etildi. Ayni paytda saylov uchastkalarining ichki va tashqi elektr ta’minoti tarmog‘i nazoratdan o‘tkazilmoqda.

O’zA