TOSHKENT FOTOSURATLAR UYIDA “QALBGA SAYOHAT” DEB NOMLANGAN KO‘RGAZMA OCHILDI

Toshkent Fotosuratlar uyida yosh rangtasvirchilar Mirali Mahmudov, Saidbek Sobirboyev, Xurshid Ibrohimov va fotograf Hasan Paydoyevning “Qalbga sayohat” deb nomlangan ko‘rgazmasi ochildi.

Birinchi Prezidentimiz Islom Karimovning 2014-yil 6-fevraldagi “O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida”gi qarori ijrosi doirasida tashkil etilgan mazkur ko‘rgazma yosh ijodkorlarni qo‘llab-quvvatlash, ularning san’atini tomoshabinlarga taqdim etishga qaratilgani bilan muhim ahamiyat kasb etadi.

Iqtidorli yoshlar Kamoliddin Behzod nomidagi Milliy rassomlik va dizayn institutini tamomlab, pedagoglik va ijodiy jarayonda faol ishtirok etmoqda. Ko‘rgazma va tanlovlarda muntazam ishtirok etib kelayotgan bu iste’dod egalarining o‘ziga xos ijod yo‘li kishini befarq qoldirmaydi.

Yosh rangtasvirchi Mirali Mahmudovning ijodi boy bo‘lib, unda portret, natyurmort, manzara janrlari keng o‘rin topgan. Qoraqalpoq xalqining noyob madaniy merosini chuqur o‘rganish yo‘lida izlanayotgan Saidbek Sobirboyev jozibador ranglar shaydosi, manzara janriga ixlos qo‘ygan Xurshid Ibrohimov chizgilarida o‘ziga xos lirik ohang ustunlik qiladi. Fotograf Hasan Paydoyev esa fotoreportaj janrida ko‘p izlanadi.

– Milliy tasviriy san’atimizning izchil rivojlanishida yoshlar ijodiga e’tibor qaratish va ularga g‘amxo‘rlik ko‘rsatish juda muhimdir, – deydi O‘zbekiston xalq rassomi Bahodir Jalolov. – Chunki ular o‘z asarlarining mazmunini yorqinroq ifodalash, yangi g‘oyalar, dolzarb mavzularni izlash bilan bu sohaga munosib hissa qo‘shmoqda.

Ko‘rgazmada yosh ijodkorlarning 70 dan ortiq asari muxlislar e’tiboriga havola etilgan.

O’zA