TURK EKSPERTLARI: O‘ZBEKISTONDA QONUN USTUVORLIGI ISLOHOTLAR SAMARADORLIGINING KAFOLATIDIR

O‘zbekiston Prezidenti Shavkat Mirziyoyevning mamlakat Prokuratura organlari xodimlari kuni munosabati bilan bir guruh soha xodimlari bilan uchrashuvi chog‘idagi ma’ruzasi xorijiy davlatlar ijtimoiy-siyosiy va huquqiy doiralarida keng sharhlanmoqda. Jumladan, turkiyalik bir guruh ekspertlar ham “Jahon” axborot agentligi muxbiriga bu boradagi o‘z fikr-mulohazalarini bayon etdilar.

Mesut Emro Qarako‘z, Turkiya Bosh vaziri devoni Qonun hujjatlari bosh boshqarmasi eksperti:

– O‘zbekiston Prezidentining prokuratura organlari vakillari bilan uchrashuv chog‘idagi ma’ruzasi menda alohida qiziqish uyg‘otdi. Binobarin, unda soha xodimlari faoliyatining asosiy yo‘nalishlari, vazifa va tamoyillari o‘z aksini topgan, ularning davlat va jamiyat hayotida tutgan o‘rniga munosib baho berilgan.

Mamlakat rahbarining fuqarolar huquq va manfaatlarini hamda qonun ustuvorligini ishonchli himoya qilish borasidagi o‘rinli mulohazalari hurmatga sazovordir. Bu, o‘z navbatida, barcha sohalarda aholi turmush darajasini yuksaltirish, mamlakatda tinchlik, ahillik va barqarorlikni ta’minlashning muhim omillari bo‘lgan islohotlarni amalga oshirish samaradorligining kafolati hisoblanadi.

Prezident Shavkat Mirziyoyevning davlat hokimiyati, jumladan, prokuratura organlari tuzilmasi va vazifalarini qulaylashtirishni, ularni mamlakat aholisining dolzarb muammolariga yaqinlashtirishni, xalq ichiga kirib borishini astoydil istashi yuksak bahoga munosibdir. Bu sa’y-harakatlar to‘laligicha “Xalq bilan muloqot va inson manfaatlari yili” konsepsiyasiga uyg‘un hamda mamlakat rahbarida noyob islohotchilik qobiliyati va respublika oldida turgan vazifalarni amalga oshirishning aniq strategiyasi borligini tasdiqlaydi.

Kurshat Qarachabey, Turkiya advokatlar uyushmasi ijroiya qo‘mitasi a’zosi:

– Biz O‘zbekistonda barcha yo‘nalishlarda, xususan, sud-huquq tizimini takomillashtirish, uni inson huquq va manfaatlarining haqiqiy himoyachisiga aylanishini ta’minlash borasida olib borilayotgan keng ko‘lamli islohotlarni katta e’tibor bilan kuzatib kelamiz.

So‘nggi yillarda ishlab chiqilgan va hayotga tatbiq etilgan qonunlar natijasida mamlakatda ko‘plab sohalarda samarali yangilanishlarni amalga oshirish imkoniyati yaratildi. Quvonarlisi, O‘zbekiston erishilgan yutuqlarga mahliyo bo‘lib qolmasdan, mamlakatni barqaror rivojlantirishning eng muhim omillaridan biri bo‘lgan qonun ijodkorligi va huquqni qo‘llash amaliyotini takomillashtirish borasidagi ishlarni jadal davom ettirmoqda.

Shu bilan birga, O‘zbekiston Prezidenti prokuratura organlarining faoliyatiga katta e’tibor qaratayotgani va shaxsan uning tashabbusi bilan mamlakatda mazkur o‘ta mas’uliyatli soha xodimlari kunining bayram qilinishi ham odamga xush kayfiyat bag‘ishlaydigan xabardir.

Biz O‘zbekiston erishayotgan muvaffaqiyatlardan benihoya xursandmiz va mamlakatingizning yanada gullab-yashnashi va taraqqiy etishiga chin dildan tilakdoshmiz.

“Jahon” AA, Anqara