UCHASTKA SAYLOV KOMISSIYALARI TARKIBI TASDIQLANDI

O‘zbekiston Respublikasi Prezidenti saylovini o‘tkazuvchi 3-Buxoro okrug saylov komissiyasining navbatdagi majlisi bo‘lib o‘tdi.

Okrug saylov komissiyasi a’zolari, okrug saylov komissiyasi matbuot markazi xodimlari va jurnalistlar ishtirok etgan majlisda okrug hududidagi uchastka saylov komissiyalarining tarkibini tasdiqlash masalasi ko‘rib chiqildi.

“O‘zbekiston Respublikasi Prezidenti saylovi to‘g‘risida”gi qonunga muvofiq, uchastka saylov komissiyasi xalq deputatlari tuman va shahar Kengashlarining tavsiyasi asosida okrug saylov komissiyasi tomonidan saylovga kamida 40 kun qolganida 5-19 nafar a’zo, jumladan, rais, uning o‘rinbosari va kotibidan iborat tarkibda tuziladi.

O‘zbekiston Respublikasi Prezidenti saylovini o‘tkazuvchi 3-Buxoro saylov okrugi hududida 501 saylov uchastkasi tashkil etilgan. Bo‘lajak saylovning yuksak saviyada o‘tishida uchastka saylov komissiyalari faoliyati muhim ahamiyatga ega.
Viloyatdagi tuman va shaharlar Kengashlari o‘z hududlaridagi saylov uchastkalari bo‘yicha komissiyalar tarkibini shakllantirib, O‘zbekiston Respublikasi Prezidenti saylovini o‘tkazuvchi 3-Buxoro okrug saylov komissiyasiga taqdim etgan.

Okrug saylov komissiyasi uchastka saylov komissiyalari tarkibini qonunda belgilangan talablar asosidako‘rib chiqib, hududdagi barcha saylov uchastkalari bo‘yicha komissiyalar tarkibini tasdiqlash to‘g‘risida qaror qabul qildi. Tarkibni ko‘rib chiqishda komissiya raisi, uning o‘rinbosari, komissiya kotibi va a’zoligiga tavsiya etilganlarning bilimi va tajribasi, tashkilotchiligi va amaldagi qonunchilikdan nechog‘li xabardorligiga alohida e’tibor qaratildi.

– Uchastka saylov komissiyalari a’zolarining qariyb 50 foizi ayollardir, – deydi 3-Buxoro okrug saylov komissiyasi raisi M.Daminov. – Shuningdek, pedagoglar, korxona va tashkilotlar rahbarlari, fuqarolarning o‘zini o‘zi boshqarish organlari vakillari ko‘pchilikni tashkil etadi.

Majlisda G‘ijduvon, Buxoro, Olot tumanlari hokimliklari, viloyat ichki ishlar, yong‘in xavfsizligi, favqulodda vaziyatlar boshqarmalari, "Suvoqova" davlat unitar korxonasi, viloyat davlat sanitariya-epidemiologiya nazorati markazi mas’ullarining joylarda saylovga tayyorgarlik ko‘rish va uni yuksak saviyada o‘tkazish borasida ko‘rilayotgan chora-tadbirlar bo‘yicha axboroti tinglandi. Saylovchilarning huquqiy madaniyatini yanada yuksaltirish, ayniqsa, birinchi marta ovoz beradigan yoshlar o‘rtasida milliy saylov qonunchiligini keng targ‘ib qilishga alohida e’tibor qaratish lozimligi ta’kidlandi.

Majlisda okrug saylov komissiyasi vakolatiga taalluqli boshqa masalalar ham ko‘rib chiqilib, qarorlar qabul qilindi.

Okrug matbuot markazida ommaviy axborot vositalari xodimlari uchun brifing o‘tkazildi.

O’zA