UCHASTKALARDA ISH QIZG‘IN

O‘zbekiston Respublikasi Prezidenti saylovini o‘tkazuvchi 7-Samarqand okrug saylov komissiyasi tomonidan Urgut tumanida tuzilgan 105 saylov uchastkasida saylovga qizg‘in hozirlik ko‘rilmoqda.

Barcha saylov uchastkalarida mazkur siyosiy tadbirni yuksak saviyada o‘tkazish uchun zarur sharoitlar yaratilgan. Saylov kabinalari, ko‘chma va statsionar qutilar, texnik vositalar bilan ta’minlangan. Tibbiyot, ona va bola xonalari kerakli ashyo va mebellar bilan jihozlangan.

Tumandagi 23-umumta’lim maktabi binosida joylashgan 936-saylov uchastkasida O‘ramas mahallasidan 2 ming 998 saylovchi ro‘yxatga olingan. Ularning 91 nafari ilk bor saylovda qatnashadigan yoshlardir.

– Uchastkada saylovchilar uchun barcha sharoit yaratildi, – deydi 936-uchastka saylov komissiyasi raisi Nozim Mirzayev. – Saylovchilar kelib ro‘yxat bilan tanishmoqda. Komissiya a’zolari, mahalla faollari yordamida barcha saylovchilarga taklifnomalar tarqatildi. Qonunchilik asosida hamda okrug saylov komissiyasining qaroridan kelib chiqib, 24-noyabrdan muddatidan oldin ovoz berish jarayoni boshlandi.

Tumandagi 886-saylov uchastkasida Jayratepa mahallasidan 2 ming 900 saylovchi 4-dekabr kuni ovoz berishda ishtirok etadi. Uchastka saylov komissiyasi raisi Mavluda Muhiddinovaning ta’kidlashicha, saylovni uyushqoqlik bilan o‘tkazish maqsadida uchastkada zarur sharoitlar yaratilgan. Barcha xonalar mebel va boshqa jihozlar, komputer va aloqa vositalari bilan ta’minlangan. Navbatchi mashina tashkil etilgan. 13 kishidan iborat komissiya a’zolari saylovchilar ro‘yxatini shakllantirish chog‘ida har bir xonadonga kirib, mazkur siyosiy tadbirning ahamiyati, ovoz berishda ishtirok etish tartibi haqida tushuncha berdi. Hududdagi ta’lim muassasalari, korxona va tashkilotlarda saylovchilarning huquqiy madaniyatini oshirishga qaratilgan targ‘ibоt tadbirlari o‘tkazildi.

O’zA