Ўзбекистон-Қатар: кўп қиррали ҳамкорлик барқарор ривожлантирилмоқда

Сўнгги йилларда Ўзбекистон ва Қатар ўртасидаги муносабатлар жадал кенгайиб бормоқда. Хусусан, 2024 йилда икки давлат ўртасидаги алоқалар стратегик шериклик мақомига кўтарилди.

Бундай фаол мулоқотнинг ривожланиши томонларнинг ҳам икки томонлама муносабатларни кенгайтириш, ҳам Марказий ва Жануби-Шарқий Осиё ўртасидаги минтақавий алоқаларни мустаҳкамлашдан юқори манфаатдорлиги билан изоҳланади.
Зеро, мамлакатимиз Қатарни Яқин Шарқдаги истиқболли иқтисодий ҳамкор деб билади. Ўзбекистон ҳам, Қатар ҳам бу борада ҳали фойдаланилмаган улкан салоҳиятга эга ва жорий муносабатларни фаоллаштириш икки давлатнинг бугунги кун тартибидан ўрин олган.
Ўзбекистон ва Қатар Марказий Осиёни Кўрфаз араб мамлакатлари билан боғловчи энг қисқа, ишончли ва хавфсиз транспорт-логистика йўлакларини шакллантиришдан манфаатдор.
Шу билан бирга, икки давлатнинг тарихи, маданияти ва диний муштараклиги, бой маънавий мероси маданиятлараро мулоқотни янада ривожлантириш учун мустаҳкам асос бўлиб хизмат қилмоқда.
Қатар замонавий Ўзбекистон ҳудудида яшаб ижод қилган буюк мутафаккир ва олимларнинг ислом цивилизацияси ривожига қўшган ҳиссасини, Арабистон ярим ороли ва Мовароуннаҳр ўртасидаги тарихий алоқаларни юксак қадрлайди.
Ушбу жиҳатлар маданиятлараро мулоқотни янада ривожлантиришга хизмат қилади ва сайёҳлик, жумладан, зиёрат туризми соҳасидаги ўзаро ҳамкорлик учун яхши истиқболларни очади.
2021 йилнинг 1 мартидан Қатар фуқароларининг Ўзбекистонга кириши учун 10 кунлик визасиз режим жорий этилди, 2023 йил июнь ойида эса бу муддат 30 кунгача узайтирилди. Бу эса ўз навбатида ўз навбатида мамлакатимизга ишбилармонлик ва туризм мақсадларида ташриф буюрувчилар сонинг бир неча баробар ортишига туртки берди.
Икки давлат ўртасида ҳаво ҳаракатини мувофиқлаштириш бўйича имзоланган келишувга биноан 2024 йил 2 июндан бошлаб, “Qatar airways” авиакомпанияси Доха – Тошкент – Доха йўналишида тўғридан – тўғри қатновларни йўлга қўйди. Бугунги кунда авиакомпания мазкур йўналишда ҳафтасига 4 маротаба қатновларни амалга оширмоқда.
Мазкур битим нафақат пойтахтлар балки республиканинг бошқа ҳудудлари билан ҳам тўғридан-тўғри қатновларни амалга оширишни назарда тутади. Келгусида “Qatar airways” авиакомпанияси йўловчилар талаб ва истакларидан келиб чиқиб, Самарқанд, Бухоро ва Хива каби туристик манзилларга ҳам рейсларни йўлга қўйишни режалаштирган.
Шунингдек, Ўзбекистон Республикаси Ҳукумати билан Қатар Давлати Ҳукумати ўртасида ҳаво қатнови тўғрисида 2021 йил 9 июнда имзоланган Битим қоидаларига мувофиқ “My Freighter” (Centrum Air) авиакомпанияси Тошкент – Доха – Тошкент йўналишида мунтазам ҳаво қатновларини амалга ошириш учун тайинланган ташувчи сифатида белгиланган.
Бугунги кунда Ўзбекистоннинг “Centrum Air” авиакомпанияси Тошкент – Доҳа – Тошкент йўналишида талаб ва таклифга асосан чартер қатновларини амалга оширмоқда.
Ҳеч муболағасиз айтиш мумкинки, бугунги кунда Ўзбекистон ва Қатар барча йўналишларда ўрнатилган мулоқот даражасини муттасил оширишга интилмоқда. Бу эса, шубҳасиз, самарали ўзаро манфаатли ҳамкорликни давом эттириш ва ривожлантириш учун икки томонлама муносабатлар пойдеворини янада мустаҳкамлашга хизмат қилади.