Ўзбекистон Бош вазирининг ўринбосари ва Франциянинг бир қатор етакчи компаниялари раҳбарлари ўзаро ҳамкорликни кенгайтиришга келишиб олдилар

Ўзбекистон ҳукумати делегациясининг Францияга ташрифи доирасида Бош вазирнинг ўринбосари - инвестициялар ва ташқи савдо вазири Жамшид Ходжаев Франциянинг қатор етакчи компаниялари раҳбарлари билан учрашувлар ўтказди, деб хабар бермоқда «Дунё» АА мухбири.

Инвестициялар ва ташқи савдо вазирлиги (ИТСВ) маълумотига кўра, қўшма инвестиция лойиҳаларини амалга оширишда компанияларнинг иштирок этиш истиқболларини муҳокама қилишга бағишланган ушбу музокараларда мамлакатимиз манфаатдор вазирлик ва идоралари раҳбарлари ҳам иштирок этди.

Хусусан, «Alstom» компаниясининг бош директори Анри Пупар-Лафарж билан суҳбат чоғида шаҳар жамоат транспортини ташкил этиш соҳасида компаниянинг ечимларини жорий қилиш имкониятлари муҳокама қилинди.

Маълумот учун: 1928 йилда ташкил этилган «Alstom» темир йўл транспорти ишлаб чиқарадиган энг йирик машинасозлик компанияларидан биридир. Унинг штати тахминан 74 минг кишини ташкил қилади. Шунингдек, компания транспорт ва йўловчилар оқимини рақамли бошқариш бўйича ечимларни ишлаб чиқмоқда. Компания дунёнинг 70 мамлакатида амалга оширган сотув савдо айланмасининг ҳажми 2021 йилда 15,5 миллиард еврони ташкил этди.

Учрашув доирасида томонлар янги лойиҳаларнинг техник-иқтисодий параметрларини батафсил ишлаб чиқиш бўйича қўшма саъй-ҳаракатларни давом эттиришга келишиб олдилар.

«Voltaliya» компанияси бош ижрочи директори Себастьян Клерк билан Ўзбекистонда қуёш ва шамол электр стансияларини қуриш бўйича бир қатор инвестиция лойиҳаларини амалга оширишда компаниянинг иштирок этиш истиқболлари муҳокама қилинди.

Маълумот учун: «Voltaliya» 2005 йилда ташкил этилган. Компания объектларининг умумий қуввати 1,9 ГВт, истиқболли лойиҳалар портфели 10,7 ГВт дан ошади. Компания дунёнинг 20 мамлакатида фаолият олиб боради.

Мулоқот давомида компаниянинг бутун дунё бўйлаб электр энергиясини ишлаб чиқариш қувватларини яратиш билан бирга объектларнинг ишончлилиги ва иш сифатининг юқори даражасини таъминлаш бўйича катта тажрибаси таъкидланди. Компания раҳбарияти, ўз навбатида, Ўзбекистонда ваколатхона очиш ва муқобил энергетика объектларини қуришга қизиқиш билдирди.

«Orano Mining» компанияси Бош директори Николя Мэйс билан бўлиб ўтган учрашувда томонлар инвестиция ҳамкорлигини кенгайтиришнинг ҳозирги ҳолати ва истиқболларини конструктив тарзда муҳокама қилдилар.

Энергетика саноати учун ускуналар ишлаб чиқаришга ихтисослашган ушбу компания раҳбарияти ўзаро ҳамкорликни янада ривожлантиришга қизиқиш билдирмоқда. Шу муносабат билан, аниқ лойиҳаларни муҳокама қилиш жараёнида Ўзбекистон томони мамлакатимизда қўшма лойиҳаларни амалга оширишда инвесторларга тўлиқ ёрдам кўрсатишга тайёр эканлигини таъкидлади.

Учрашув якунлари бўйича ўзаро муносабатларнинг кўриб чиқилган йўналишларини илгари суриш бўйича навбатдаги тадбирлар ишлаб чиқилди.

«Дунё» АА