Ўзбекистон Президентининг IV Тошкент халқаро инвестиция форумидаги нутқи Германия ОАВ нигоҳида

Германиянинг "Berliner Telegraph" электрон журналининг саҳифасида Ўзбекистон Президенти Шавкат Мирзиёевнинг тўртинчи Тошкент халқаро инвестиция форумида (ТХИФ) сўзлаган нутқига бағишланган таҳлилий мақола эълон қилинди, деб хабар қилмоқда "Дунё" АА мухбири.

Мақолада ёзилганидек, 10-12 июнь кунлари Ўзбекистоннинг иқтисодий салоҳияти намойиш этилган форумда 8 мингдан ортиқ киши, жумладан, 97 хорижий давлатдан 3 мингга яқин халқаро даражадаги мутахассис ва экспертлар қатнашди. "150 дан зиёд таниқли маърузачилар иштирокида 36 та панель сессиялар ташкил этилди, тадбир доирасидаги кўргазмада юзлаб маҳаллий ишлаб чиқарувчилар тўқимачилик ва туризмдан тортиб металлургия ва энергетика, шунингдек, IT соҳасидаги ютуқларни тақдим этди, умумий қиймати қарийб 30,5 миллиард АҚШ долларга тенг сармоявий ва савдо шартномалари имзоланди", – деб таъкидланган нашрда.

Қайд этилишича, Ўзбекистон Президенти форумнинг расмий очилиш маросимида сўзлаган нутқида мамлакатда амалга оширилаётган ислоҳотлар самарадорлиги халқаро рейтингларда эътироф этилаётганлигини таъкидлади. Сўнгги беш йил ичида Ўзбекистон "Иқтисодий эркинлик индекси"да 48 поғонага кўтарилган.

"Президент Шавкат Мирзиёев, шунингдек, сўнгги саккиз йилда мамлакат ялпи ички маҳсулоти икки баробарга ошганини алоҳида урғулади. 2030 йилга бориб бу кўрсаткични 200 миллиард долларга етказиш мақсад қилинган. Ўтган йили Ўзбекистонга киритилган сармоялар ҳажми 35 миллиард долларга, экспорт ҳажми эса 27 миллиард долларга етган. Эътиборлиси, Ўзбекистон IT маҳсулотлари экспорти 2025 йилда 1 миллиард долларга яқинлашди", – дея маълум қилади "Berliner Telegraph".

Мақолада давлат раҳбари ўз нутқида Ўзбекистоннинг жадал иқтисодий ўсиши мақсадли ислоҳотлар ва халқаро инвесторларни рағбатлантиришнинг натижаси эканлиги, ижобий иқтисодий кўрсаткичларга эришиш билан бир қаторда аҳолига янги иш ўринлари яратишга катта эътибор берилаётганини таъкидлагани урғуланган.

Немис ОАВга кўра, Ўзбекистон бугунги кунда Марказий Осиёда замонавий мегаполисга айланиши билан бир қаторда инвесторлар учун жозибадор инвестиция киритиш манзилига айланган. Тошкентда турли соҳаларда салмоқли молиявий айланмага эга кўплаб компаниялар фаолият юритади. Марказлашишдан йироқлашаётган мамлакат ҳудудларида ҳам фаровонлик сезиларли даражада ошган.

"Ўзбекистон етакчиси мамлакатнинг асосий йўналишларига тўхталиб, қайта тикланадиган энергетика соҳасида, асосан қуёш ва шамол электр станциялари ҳисобидан 9,6 гигаватт янги қувватлар яратилгани, электр ишлаб чиқариш 59 миллиарддан 82 миллиард киловатт-соатга етганини маълум қилди. Ўзбекистон Президентининг сўзларига кўра, яқин беш йил ичида бу кўрсаткич 120 миллиард кВт/соатдан ошади, "яшил" энергия улуши эса 54 фоизни ташкил этади", – дея урғуланган материалда.

Марказий Осиёдаги ушбу давлатда тоғ-кон саноати етакчи тармоқлар ҳисобланади. Шу боис немис компаниялари кенг қамровли ислоҳотлар туфайли Ўзбекистонда юқори сармоявий салоҳият мавжудлигини кўрмоқда, деб таъкидланган нашр.

Мақола германиялик шарҳловчи Грегор Шпиценнинг "Форум Ўзбекистон иқтисодиётини тақдим этиш ва тарғиб қилиш учун марказий платформа сифатида ўзини намоён қилди. Мамлакат ўзининг қулай географик жойлашувидан фойдаланиши баробарида минтақада жозибадор сармоявий йўналиш сифатида хорижий инвесторлар учун очиб бераётган имкониятларини эътибордан четда қолдириб бўлмайди",– деган сўзлари билан якунланган.