Яқин Шарқ мамлакатларининг етакчи оммавий ахборот воситаларида Ўзбекистон мавзуси

Яқин Шарқ мамлакатларида етакчи оммавий ахборот воситалари Ўзбекистонда амалга оширилаётган кенг кўламли ислоҳотларнинг мазмун-моҳияти ва Марказий Осиё – Кўрфаз араб давлатлари ҳамкорлик кенгаши ўртасидаги муносабатларга бағишланган туркум мақолалар эълон қилинди, деб хабар қилмоқда "Дунё" АА мухбири.

Хусусан, Саудия Арабистонининг "Al Harir" газетаси сайтида "Ўзбекистон Президенти Россия ташқи ишлар вазирини қабул қилди" сарлавҳали мақола эълон қилинди.

Унда Ўзбекистон Президенти Шавкат Мирзиёев 23 апрель куни Самарқанд шаҳрида амалий ташриф билан мамлакатимизда бўлиб турган Россия Федерацияси ташқи ишлар вазири Сергей Лавров бошчилигидаги делегацияни қабул қилгани хабар қилинган.

"Суҳбатда Ўзбекистон-Россия дўстлик, кенг қамровли стратегик шериклик ва иттифоқчилик муносабатларини олий даражада эришилган келишувларни амалга ошириш нуқтаи назаридан янада мустаҳкамлашнинг долзарб масалалари кўриб чиқилди", – деб ёзилган мақолада.

Саудиянинг "Wrkaa News" газетасида босилган "Ўзбекистон Президенти "ИННОПРОМ" халқаро кўргазмасини бориб кўрди" сарлавҳали мақолада маълум қилинганидек, Президент Шавкат Мирзиёев 28 апрель куни Тошкент шаҳрида иш бошлаган "ИННОПРОМ. Марказий Осиё" бешинчи халқаро саноат кўргазмасига ташриф буюрди. "Ўзбекистон раҳбари давра суҳбатида иштирок этди. Унда Ўзбекистон-Россия ҳудудлари ва етакчи компаниялари раҳбарлари кооперация лойиҳаларини амалга ошириш бўйича аниқ режаларни тақдимот қилдилар", – деб таъкидланган.

"Watan News" ва "Al Harir" газеталари БМТ Бош Ассамблеяси Ўзбекистон ташаббуси билан Ўрмонзорлаштириш ва ўрмонларни тиклаш декадаси ҳақидаги резолюцияни қабул қилгани доир материалларни эълон қилди. Нашрларда Резолюция Амазондан кейин дунёдаги иккинчи энг катта тропик ўрмонга эга бўлган Конго Республикаси билан биргаликда илгари сурилгани қайд этилган.

"Ҳужжат асосини Ўзбекистон Президент Шавкат Мирзиёев томонидан илгари сурилган "Атроф-муҳитни муҳофаза қилиш ва "яшил" иқтисодиёт йили" давлат дастури, "Яшил макон" умуммиллий лойиҳаси ҳамда "Марказий Осиёнинг "яшил" белбоғи" кўчат экиш акцияси ташкил этади", – деб ёзган Саудия ОАВ.

Ушбу мамлакатнинг "An Nahar News" газетаси сайтида "Ўзбекистон тарихида илк марта БМТ Статистика Комиссиясига бир овоздан сайланди" сарлавҳали мақола жойлаштирилди. "Ўзбекистоннинг ушбу орган аъзоси этиб сайланиши мамлакатда Президент раҳбарлигида амалга оширилаётган кенг кўламли ислоҳотларнинг халқаро миқёсда тан олинганлигини ва мамлакатнинг глобал жараёнлардаги ўсиб бораётган ролини кўрсатади", дейилади нашрда.

"Nabd Al Hadas" газетаси сайтида эълон қилинган "Жиззах – 2025": узоқ муддатли халқаро ҳамкорликни йўлга қўйиш платформаси" сарлавҳали мақолада Ўзбекистон ташқи ишлар вазирлиги томонидан Зомин туманида ўтказилган бизнес-форум ҳақидаги маълумотлар қаламга олинган.

Шунингдек, "An Nahar News" ва "Arab News" нашрлари Марказий Осиё ва Кўрфаз араб ҳамкорлик кенгаши давлатлари ўртасидаги ҳаморлик тарихи, бугунги ҳолати ва истиқболлари ҳақида ёзди.

Яманнинг "Hadramawt" агентлиги сайтида жойлаштирилган мақолада Ўзбекистоннинг 2025 йилнинг биринчи чорагида ташқи савдода эришган натижалари таҳлил қилинган.