Яқин Шарқ мамлакатларининг етакчи оммавий ахборот воситаларида тўртинчи Тошкент халқаро инвестиция форуми мавзуси

Саудия Арабистони ва Иорданиянинг етакчи оммавий ахборот воситалари Ўзбекистонда бўлиб ўтган тўртинчи Тошкент халқаро инвестиция форуми ишини ва унинг доирасида бўлиб ўтган тадбирларни кенг ёритди, деб хабар қилмоқда "Дунё" АА мухбири.

Жумладан, Саудия Арабистонининг "An Nahar News" газетаси мақолада Президент Шавкат Мирзиёев IV Тошкент халқаро инвестициявий форумининг ялпи мажлисида сўзлаган нутқида мамлакат келгуси беш йил ичида муқобил инвестиция ва лойиҳалар ҳажмини 1 миллиард долларга етказишни мақсад қилгани ҳақида ёзди. Қайд этилишича, стартапларни қўллаб-қувватлаш ва инвестиция воситаларини кенгайтириш мақсадида Ўзбекистонда муқобил инвестиция фондлари тўғрисидаги қонун лойиҳаси ишлаб чиқилди.

Мазкур нашрда таъкидланишича, мамлакатда венчур капиталининг тез ўсиши кузатилди, иккита маҳаллий стартап компанияси ўтган йили 1 миллиард доллардан ошди. Капитал бозорини ривожлантиришга қаратилган кенг кўламли ислоҳотлар доирасида янги миллий қайта суғурта компанияси ҳам ташкил етилди ва ’global’ рақамли қайта суғурта платформаси ишга туширилди.

"An Nahar News" газетаси, шунингдек, "Ўзбекистон Президенти Янги тараққиёт банки билан шерикликнинг устувор йўналишларини белгилаб берди" сарлавҳали мақолани ўз муштарийлари ўртасида тарқатди.

Нашрда Ўзбекистон Президенти Шавкат Мирзиёев 9 июнь куни Тошкент халқаро инвестиция форумида иштирок этиш учун мамлакатимизга келган БРИКС Янги тараққиёт банки президенти Дилма Русефни қабул қилгани хабар қилинган.

"Ушбу кўп томонлама молиявий институт билан амалий ҳамкорликни ривожлантириш масалалари муҳокама қилинди. Шунингдек, йирик минтақавий инфратузилма лойиҳалари қўллаб-қувватланди", – деб ёзган Саудия босма нашри.

Ушбу мамлакатнинг оммабоп "Sahm News" электрон нашри Ўзбекистон Президенти Шавкат Мирзиёев Хорижий инвесторлар кенгаши мажлиси доирасида Ўзбекистон-Саудия Ишбилармонлар кенгаши ҳамраиси, "ACWA Power "компанияси бошқаруви раиси Муҳаммад Абунайян бошчилигидаги йирик компаниялар делегациясини қабул қилганини маълум қилди.

"Мулоқот чоғида Саудия ишбилармонлари билан амалий ҳамкорликни янада кенгайтириш ва юртимиздаги устувор лойиҳаларни жадаллаштириш масалалари кўриб чиқилди. Саудиянинг "ACWA Power" ва бошқа компаниялари билан сермаҳсул шериклик йўлга қўйилгани мамнуният билан қайд этилди", – дея урғуланган материалда.

Нашрда бугунги кунда қўшма лойиҳалар портфели 24 миллиард долларга етгани, "яшил" энергетика соҳасидаги лойиҳалар муваффақиятли амалга оширилаётгани, Тошкент вилоятида "яшил" водород ишлаб чиқариш йўлга қўйилгани таъкидланган.

Шунингдек, "Sahm News" электрон нашри тўртинчи Тошкент халқаро инвестиция форумида 8 минг делегат иштирок этгани ҳақида хабар қилди.

Иорданиянинг "Ammon News" газетасида "Тошкентда бўлиб ўтган Ўзбекистон-Америка бизнес форуми: Стратегик иқтисодий ҳамкорликнинг янги босқичи" сарлавҳали мақолалар чоп этилди.

Унда тўртинчи Тошкент халқаро инвестиция форуми доирасида ташкил этилган Ўзбекистон–Америка бизнес-форуми ҳақидаги сўз боради. Маълум қилинганидек, форум Ўзбекистон Инвестициялар, саноат ва савдо вазирлиги ҳамда Америка–Ўзбекистон Савдо палатаси ҳамкорлигида ўтказилди.

"2024 йил якунларига кўра, Ўзбекистон ва АҚШ ўртасидаги савдо айланмаси 15 фоизга ошиб, 881,7 миллион АҚШ долларига етди. АҚШдан киритилган тўғридан-тўғри инвестициялар ҳажми эса 612,6 миллион долларга етган. Мамлакатда АҚШ капитали иштирокидаги 314 та корхона фаолият юритмоқда, шундан 167 таси 100 фоиз АҚШ сармояси асосида ташкил этилган корхоналардир", – дейилган материалда.

Иордания газетаси мазкур тадбирда икки давлатнинг ишбилармон доиралари ва давлат ташкилотларидан 150 дан ортиқ вакиллар иштирок этгани ҳақидаги маълумотларни муштарийлар эътиборига тақдим қилган.