Янги Ўзбекистонда гендер тенглигига эришиш бўйича амалга оширилаётган ислоҳотлар Тожикистон ОАВ нигоҳида

Тожикистоннинг "Аvеsта" ахборот агентлиги "Гендер тенглиги – Янги Ўзбекистонни барпо этиш тамойилларидан бири" сарлавҳали мақолани тарқатди, деб хабар қилмоқда "Дунё" АА мухбири.

"Ўзбекистон – ортга қайтмас, жадал ислоҳотлар мамлакати, – деб ёзган муаллиф. – Янги Ўзбекистон тараққиёт стратегиясининг устувор йўналишларидан бири мамлакатда гендер тенглигига эришиш сиёсатидир".

Нашрда "Ўзбекистон – 2030" тараққиёт стратегиясига мувофиқ хотин-қизларнинг сиёсий, ижтимоий, иқтисодий фаоллигини ошириш, оналик ва болаликни муҳофаза қилиш, гендер тенглигини таъминлаш, хотин-қизларнинг ҳуқуқ ва манфаатларини таъминлаш борасида кенг кўламли чора-тадбирлар амалга оширилаётгани таъкидланган.

Давлат раҳбарининг сиёсий иродаси туфайли Ўзбекистоннинг 2030-йилгача бўлган гендер стратегияси ишлаб чиқилди, деб маълум қилган агентлик.

Ўзбекистон Президенти Шавкат Мирзиёев ташаббуси билан мамлакатда камбағалликни қисқартириш, "Аёллар дафтар"ини йўлга қўйиш, хотин-қизлар ўртасида ишсизликни камайтириш ва аёллар тадбиркорлигини қўллаб-қувватлаш борасида амалга оширилаётган тизимли чора-тадбирлар кўрилиши ва хотин-қизларга имтиёзли кредитлар ажратилиши натижасида сезиларли даражада самара бермоқда. Шунингдек, аёлларнинг касб танлашига нисбатан бир қатор чекловлар олиб ташланди.

"Маҳаллаларда хотин-қизлар аҳволини ўрганиш натижасида 690 мингдан ортиқ ижтимоий ҳимояга муҳтож оилаларга манзилли ёрдам кўрсатилди. 2024 йилда "Ёшлар дафтарига" киритилган 8 минг нафар хотин-қизларга тадбиркорлик фаолиятини йўлга қўйиш ва асбоб-ускуналар харид қилиш учун субсидия, 10 минг нафарига имтиёзли кредит ажратиш кўзда тутилган. Тадбиркорлик фаолиятини йўлга қўйишда амалий ёрдам кўрсатиш мақсадида малакали мутахассислар иштирокида 50 минг нафар ёш хотин-қиз учун "Бизнес марафон" лойиҳасини йўлга қўйиш режалаштирилган", –дейилади материалда.

Мамлакатда хотин-қизларнинг таълим олиши учун яратилган имконият ва шарт-шароитларнинг яхшиланиши замонавий билим ва касбларни эгаллашга қизиқишнинг ошишига туртки бўлди. Масалан, "Бир миллион дастурчи" таълим лойиҳаси иштирокчиларининг 47 фоизини қизлар ташкил этди.

Хотин-қизларга таълим соҳасида яратилган қулай шарт-шароитлар уларнинг салоҳиятини юзага чиқаришда аниқ самаралар бермоқда. Ўтган етти йилда 5 мингдан ортиқ хотин-қиз фалсафа доктори ва фан доктори илмий унвонларига сазовор бўлди. Бугунги кунда Ўзбекистондаги олий ўқув юртларида 14 мингдан ортиқ хотин-қиз илмий изланиш олиб бормоқда.

"Сўнгги йилларда Марказий Осиё давлатлари билан гендер тенглиги соҳасидаги ҳамкорликка ҳам катта аҳамият берилмоқда. Жорий йилда Марказий Осиё мамлакатлари Етакчи аёллари мулоқоти ва Осиё хотин-қизлари форуми муваффақиятли ўтказилди", – деб ёзган "Аvеsта" АА.