YEI MAXSUS VAKILI: “O’ZBEKISTON DIQQATGA MOLIK SALOHIYATGA EGA”

O’zbekiston Respublikasi Prezidenti Islom Karimovning mamlakatimizni 2015-yilda ijtimoiy-iqtisodiy rivojlantirish yakunlari va 2016-yilga mo’ljallangan iqtisodiy dasturning eng muhim ustuvor yo’nalishlariga bag’ishlangan Vazirlar Mahkamasi majlisidagi ma’ruzasi hamon jahon hamjamiyatida o’zining aks-sadosini bermoqda.

Quyida Yevropa Ittifoqi siyosiy doiralarining vakilining “Jahon” axborot agentligiga bergan intervyusi chog’ida davlatimiz rahbarining mazkur ma’ruzasi yuzasidan bildirgan o’z fikr-mulohazalari bayon etiladi.

Peter Burian, Yevropa Ittifoqining Markaziy Osiyo bo’yicha maxsus vakili:

— O’tgan yili mamlakatingiz iqtisodiyoti barqaror rivojlanishda davom etganini tilga olish menga mamnuniyat bag’ishlaydi. Nomaqbul global iqtisodiy tamoyillar saqlanib turgan bo’lishiga qaramay, biznes yuritish uchun qulay sharoitlarni yaratish bo’yicha O’zbekiston Jahon iqtisodiy forumi va Jahon banki reytinglarida yuqori bahoga sazovor bo’ldi.

Men Toshkentda o’tkazilgan Xalqaro sarmoyaviy forum ishida shaxsan qatnashishga muyassar bo’ldim. Respublika rahbariyatining iqtisodiyotni yanada liberallashtirish va modernizatsiyalashga sodiq ekanligini ko’rdim. Mazkur tadbir mahalliy bozor imkoniyatlarini o’rganishda jahon ishbilarmonlar hamjamiyatining yanada faol qatinashishga bo’lgan qiziqishi o’sib borayotganini ko’rsatdi.

Ishonchim komilki, majmuaviy tizimli islohotlarni davom ettirish O’zbekistonga o’zining diqqatga sazovor bo’lgan iqtisodiy salohiyatini hayotga tadbiq etish va yanada ko’proq xorij kapitalini, shu jumladan, YEI sarmoyalarini jalb etish imkonini beradi.

Biz tajriba va ilg’or texnologiyalarni almashish yo’li bilan mamlakatingiz bilan hamkorlikni mustahkamlashga hamda respublikani modernizatsiyalash jarayonlarida qadrli sherik bo’lishga tayyormiz. Bundan tashqari, biz O’zbekistonda biznes muhitini yanada takomillashtirish bo’yicha muloqot olib borish va hamkorlik qilishni rejalashtirmoqdamiz. Chunki O’zbekistonning iqtisodiy islohotlarni amalga oshirish, raqobatbardoshlikni oshirish, qishloq xo’jaligini rivojlantirish bo’yicha keng ko’lamli ishlarni davom ettirish yuzasidan qarori qat’iydir. O’ylaymanki, mamlakat o’z oldiga qo’ygan aniq maqsadga, ya’ni 2030-yilga borib yalpi ichki mahsulot hajmini kamida 2 barobar oshirishga hamda yuqori daromad darajasi va iqtisodiyoti rivojlangan davlat maqomiga erishadi. YEI O’zbekiston sa’y-haraktlarini qo’llab-quvvatlash uchun o’zaro hamkorlik mexanizmlaridan unumli foydalanishga tayyor.

So’zim oxirida o’zbek xalqini tobora yaqinlashib kelayotgan qutlug’ sana - davlat Mustaqilligining 25 yilligi bilan tabriklashga istar edim. O’ylaymanki, ushbu yubiley sanasi tarixan qasqa davr ichida qo’lga kiritilgan muvaffaqiyatlarni sarhisob qilish bilan birga bundan keyingi iqtisodiy muvaffaqiyatlarning eng maqbul yo’llarini belgilab olish uchun ham yaxshi imkoniyat yaratadi. Shu o’rinda YEI O’zbekistonni doimo qo’llab-quvvatlashga tayyor ekanligini ma’lum qilishni istar edim.

“Jahon” AA, Bryussel