YOSHLAR KONSTITUTSIYANI O‘RGANMOQDA

Toshkent shahar adliya boshqarmasi tomonidan Jahon iqtisodiyoti va diplomatiya universiteti qoshidagi Shayxontohur akademik litseyida O‘zbekiston Respublikasi Konstitutsiyasi qabul qilinganining 23-yilligi munosabati bilan “Mamlakat taraqqiyotining mustahkam poydevori” mavzusida ma’naviy-ma’rifiy tadbir o‘tkazildi.

Toshkent shahar adliya boshqarmasi boshlig‘i A.Safoyev va boshqalar davlatimiz rahbarining 2001-yil 4-yanvarda qabul qilingan “O‘zbekiston Respublikasi Konstitutsiyasini o‘rganishni tashkil etish to‘g‘risida”gi farmoyishi yosh avlodga Asosiy qonunimiz mazmun-mohiyatini tushuntirish va uni keng targ‘ib etishda muhim omil bo‘layotganini ta’kidladi.

Adliya organlari turli tashkilot va idoralar bilan hamkorlikda yoshlar ishtirokida tadbirlar o‘tkazib kelmoqda. Ularda yoshlarning bilim olishi, kasb-hunar egallashi, o‘z iqtidor va salohiyatini namoyon etishi uchun yaratilayotgan imkoniyatlarning huquqiy asosi Konstitutsiyamizda o‘z ifodasini topgani, Bosh qomusimizning har bir moddasi fuqarolar manfaatlariga xizmat qilayotgani hayotiy misollar bilan tushuntirilmoqda.

Konstitutsiyamizda yoshlarning ta’lim-tarbiyasi, ijtimoiy muhofazasi, intellektual salohiyatini namoyon etishi, kasb-hunar egallashi kabi asosiy huquqlari mustahkamlab qo‘yilgan. Bunday tadbirlar yoshlarning Bosh qomusimizni puxta o‘zlashtirishiga yordam qilmoqda.

Tadbirda litsey o‘quvchilari Bosh qomusimizga cheksiz hurmat va iftixor tuyg‘ulari ifodalangan she’rlar o‘qidi.

O‘zA